A Consellaría do Medio Rural realizará as obras de saneamento en Vilanova

29.06.07 14:25

Cun investimento de 143.000 euros, a materialización deste proxecto permitirá que todas as vivendas deste núcleo do concello dispoñan de conexión á rede de saneamento.

Segundo informou hoxe o alcalde, Alfredo García, a Consellaría do Medio Rural asume a realización da obra denominada “Saneamento en Vilanova, zona do heliporto” cun orzamento de 143.000 euros para investir nesta localidade próxima á vila do Barco. A concreción do proxecto suporá unha importante mellora na dotación das infraestruturas na parroquia de Vilanova de Valdeorras, ao posibilitar que todas as vivendas do seu núcleo principal estean conectadas á rede de saneamento, corrixindo as eivas detectadas neste terreo. A descrición dos traballos feita polos servizos técnicos municipais contempla, entre outras actuacións, as seguintes: a colocación de máis de 1500 metros lineais de tubaxes de PVC para a evacuación e o desaugamento en canalizacións soterradas, a execución de 45 pozos de rexistro e de 20 acometidas domiciliarias de saneamento, a restitución do pavimento de aglomerado logo das obras de perforación para a colocación dos tubos, así como a reposición dos foxos de desaugamento en formigón. Finalmente, prevese que as obras estean rematadas nun prazo aproximado de tres meses.

OBarcoDeValdeorras

Nueva Ventana Xunta de Galicia
  • Rus
  • Eng