O Barco homenaxea a Novoneyra conmemorando o “Canto ó Sil”

11.05.10 10:38

A figura de Uxío Novoneyra (Letras Galegas 2010) será obxecto de homenaxe na Biblioteca Florencio Delgado Gurriarán coa presentación dunha biografía e a conmemoración do “Canto ó Sil” poema feito no Barco polo bardo do Courel en 1988. Serán os días 18 e 19 de maio a partir das 20 horas.

Caligrafía de Uxío Novoneyra para o "Canto ó Sil"

Caligrafía de Uxío Novoneyra para o "Canto ó Sil"

O martes 18 de maio ás 20 h. terá lugar a presentación do libro "A distancia do lobo. Biografía de Uxío Novoneyra" (ed. Galaxia, Vigo, 2010) de Antón Lopo, coa presenza do propio autor. O libro é un percorrido pola vida de Novoneyra contado en primeira persoa. O narrador métese na personaxe do poeta, transita os lugares nos que viviu, en especial O Courel que empapa a súa obra de forza telúrica, sinte  por el as emocións que toman forma de poema e transmite os seus pensamentos sobre o mundo que lle tocou vivir, a nación, a cultura e a lingua.

O mércores 19 de maio ás 20 h. vaise conmemorar, tamén na Biblioteca FDG, a creación do poema "Canto ó Sil" que fora composto por Novoneyra nunha estadía súa no Barco, entre o 20 e o 21 de maio de 1988, atendendo unha encarga de Lauro Olmo, con quen paseaba polo Malecón, cara á tardiña, tras asistiren ambos á Feira do Libro. O dramaturgo barquense, namorado do Sil, contemplando o río que ía "ó ras cheo d´auga" díxolle ao seu acompañante que lle tiña que facer un poema. A escena foi presenciada por varias persoas que camiñaban canda eles. Esa mesma noite, no hotel, o poeta courelao constrúe os quince versos que titula "Canto ó Sil" e que ese mesmo ano publica nun cartafol con gravados de Alfonso Costa titulado "A illa verde". Logo incluirao, con algunhas modificacións, no libro "Poemas da doada certeza i este brillo premido entre as pálpebras" (ed. Espiral Maior, A Coruña, 1994). Trátase dun dos poemas máis fermosos inspirado no río Sil ao seu paso polo Barco e un canto vitalista e de amizade. No acto lerase o poema, volverá escoitarase a voz de Uxío Novoneyra nos seus celebrados recitais e exporanse recortes de prensa e curiosidades relacionadas con aquel acontecemento.

OBarcoDeValdeorras

Nueva Ventana Xunta de Galicia
  • Rus
  • Eng